Syukur Nikmat (Base Sasak)

اَلْحَمْدُ ِللهِ الَّذِىْ نَزَّلَ الْـقُرْآنَ لِيُخْرِجَ النَّاسَ مِنَ الظُّـلُمَاتِ اِلَى النُّوْرِ وَيَهْدِيْهِمْ بِمَافِيْهِ مِنَ الْهُدى وَالْفُرْقَانِ. اَشْهَدُ اَنْ لاَاِلهَ اِلاَّ اللهُ وَحْدَهُ لاَشَرِيْكَ لَهُ وَاَشْهَدُ اَنَّ سَيِّدَنَامُحَمَّدًاعَبْدُهُ وَرَسُوْلُهُ. اَللّهُمَّ صَلِّ وَسَلِّمْ وَبَارِكْ عَلَى سَيِّدِنَامُحَمَّدٍوَعَلَىآلِهِ وَصَحْبِهِ اَجْمَعِيْنَ. اَمَّابَعْدُ، فَيَاعِبَادَ اللهِ اِتَّقُوااللهَ حَقَّ تُقَاتِهِ وَلاَتَمُوْتُنَّ اِلاَّ وَاَنْتُمْ مُسْلِمُوْنَ

Alhamdulillahirabbilalamin puja dait puji syukur teatturin tipak deside Allah SWT sak sampun icanin pelungguh tiang kesehatan dait ksesempatan sehingga mangkin niki maukte sesarengan melaksanakan sopok kewajiban pelunguh tiang selakuu kaum muslimin yakni shalat jum’at berjamaah. Mudah2an selapuk niki akan semakinmeningkatkan keimanan dan ketaqwaan pelungguh tiang tipakde side Allah SWT.


Shalawat serta salam tiang ngiring aturin tipa junjungan alam nabi besar Muhammad SAW sak sampun ajah pelungguh tiang care dait aturan idup sak tereda’ kance teperintahan isikde side Allah SWT.

Sidang jum’at Rahimakumullah……………
Le dalem qishasul anbiya, atau cerita tentag sejarah nabi-nabi, tekesahan tentang 2 manusia sak dateng menghadap tipa nabi Musa AS. Sak pertame, manusie sak santer isikne jeleng, kance sak kedua manusia sak santer isikne sugih. Sak marek pertame kali yakni umat nabi musa sak jeleng nike, dateng beketuan tipa nabi : wahai Nabi, tiang niki santer isik tiang jeleng, mangkin silak tunasan tiang tipa’ deside Allah adek sak tiang bau jari dengan sugih. Usa lang ngendike : Lamun meno, mulai nane, luek-luek entan bersyukur tipakde side Allah. Ndekman doang tutuk base nabi muse AS, manusie sak jeleng baru niki langsungne nimbal : Yaok gama Nabi, berembe entan tiang jak inik bersyukur, mangan ndek tiang keruan, kelambin tiang enggane sopok dopok niki doang, bale rase taokne boros, jari berembe ntan tiang jak tao bersyukur ? enggih lamun marak nike, mangkin silak olek, kance engetan, loek-loek ntan bersyukur. Sedekne ngonek, dateng terus manusie sak sugih, akde side Nabi Musa aturan peketuanan : e gamak nabi, tunasan gamak, berembe entan adek tiang tekurangi kesugihan niki, sengak kadang-kadang tiang merase terganggu isik loek doe bande sak jak tiang runguk. Nabi Musa bebase : Lamun meno, engkah bersyukur tipa deside Allah, loek-loek entan ingkar tipa nikmat sak sikde terima. Manusie sugih niki nimbal : yao Nabi, berembe entan tiang jak engkah bersyukur atau ingkar tipak deside Allah, tiang tekicanin Ime kadu tiang memete, tiang tekicanin nae kadun tiang lamapak, tiang tekicanin pikiran sak solah kadun tiang berakal, jari ndektiang mungkin jak tao ingkar tiap nikmat Allah, ndek tiang mungkin jak engkah bersyukur tipa selapuk ruen rezeqi sak siang tiang terimak.

Kocap cerite, kedue umat Nabi muse niki akhirne tulak tipak bale mesak-mesak, dait tetep marak sak sampun liwat. Umat sak jeleng niki, tetepne merase ndekne perlu jak bersyukur tipa deside Allah sengakne sak tetep doang jeleng, sementare manusie sak sugih niki, sayan loek entanne bersyukur isik ruen nikmat sak sikne terima. Akhirne dengan seizin Allah, manusie sak jeleng niki sayan jeleng sengakne ndek mele bersyukur, sedangkan sak sugih niki, sayanne sugih sengak loek entanne bersyukur.

Sidang jum’at Rahimakumullah……………
Mangkin silak pelinggih tiang endeng tipak awak pelinggih tiang mesak-mesak. Mbe engkah pelinggih tiang bau bersyukur tipak deside Allah. Selapuk manusie tekicanin nikmat sak pade dalam hal jasad, walaupun arak endah sak tecobe isi kekurangan-kekurangan. Selapuk manusie lek seluruh dunie, tekicanin waktu sak pade, 24 jam sejelo sekelem. Laguk sak jari bedene adalah, berembe ntan manusie sak kadu ruen nikmat Allah sak pade nike, kade jari napi pengadu leman kenikmatan nike. Lamun awakte sak solah niki, dait waktu sak sejelo sekelem niki tekadu bagus-bagus, pastine jak bagus kejarianne, lagu lamun ndek keruan ntannne ketadu berarti ndekne jak keruan endah tipakne. Le dalem hal niki, ye ampokne kepenggitan ruen manusie sak tao atau endek bersyukur tipa deside Allah. Allah sampun bemanik dalam surat Ibrahim ayat 7 dait 8 :
.................................................
Ingetan napi Manik lekan deside Allah : Sai-sai juak sak tao bersyukur tipak nikmatku pasti jak rombok ruen kenikmatan nike, laguk sai-sai jua sak endekne tao syukur atau ingkar tipa nikmatku, maka sesungguhne azabku santer isik nyakit.(7) Bebase Nabi Musa AS : Lamun side selapuk dait selapuk isin dunie ingkar tipak deside Allah, sesungguhne ndekne arak pengaruhne tipak deside Allah, mekeranak Allah santer isikne Sugih dait Mulie. (8)

Sidang jum’at Rahimakumullah……………
Salak sopok carente bersyukur tipa nikmat niki, yakni adekte sak tetep kadu ruen kenikmatan sak tekicanin tipa pelungguh tiang lek jalan sak teridlai isikde side Allah, terutame adekne sak ara manfaat tifa batur sak lain. Tekicanin ime solah, silak tekadu tulung batur, tekicanin nae bagus, silak tekadu bekelampan tipa pegawean sak bagus, tekinanin pengengat sak sempurne, silak tekadu seriokan sak solah2, tekinanin elak, silak tekadu ucap sak pantes-pantes. Semenoan jua lamun tekincanin doe bande, silak tebelanjak atau tekadu tulung batur sak lain. Insya Allah lamun pelinggih tiang tao bersyukur nikmat Allah pastine jak sayan molah. Laguk lamun selapuk sak tekinanin isikdes ide Allah ndek keruan ntan tekadu, ndekne keruan laik tejauk, silak, karing jak anteh ruen menggah dait murke lekan deside Allah, sang ne langsung atau tetunde waktune, laguk pastine jak kepenggitan.

Sidang jum’at Rahimakumullah……………
Mawinan nike, lek dalam kesempatan sak santer isikne mulie niki, silak tebareng-bareng saling ingetan, salaing badak tipa pegawean sak solah2, sak tereda isikdes ide Allah, sehingga pelinggih tiang termasuk lek dalem umat sak tao bersyukur tipa selapuk nimat Allah, belek atau kodek nikmat nike, haruste tetep aturin syukur.

بَارَكَ اللهُ لِى وَلَكُمْ فِى الْقُرْآنِ الْكَرِيْمِ وَنَفَعَنِى وَاِيَّاكُمْ بِمَافِيْهِ مِنَ اْلآيَاتِ وَالذِّكْرِالْحَكِيْمِ وَتَقَبَّلَ اللهُ مِنَّاوَمِنْكُمْ تِلاَوَتَهُ اِنَّهُ هُوَ السَّمِيْعُ الْعَلِيْمُ.