Makna Idul Qurban (base sasak)

Oleh : KHALILURRAHMAN, S.Ag

اَلْحَمْدُ للهِ رَبِّ الْعَالَمِيْنَ وَالْعَاقِبَةُ لِلْمُتَّقِيْنَ وَلاَعُدْوَانَ إِلاَّعَلىَ الظَّالِمِيْنَ أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ خَصَّنَا بِخَيْرِ كِتَابٍ أُنْزِلَ وَأَكْرَمَنَا بِخَيْرِنَبِيٍّ أُرْسِلَ وَأَتَمَّ عَلَيْنَا نِعْمَةََََََ الصِّيَامِ بهذا العيد الْمُبَارَكِ وَأَشْهَدُ أَنَّ مُحَمَّدًاعَبْدُهُ وَرَسُوْلُهُ بَلَّغَ الرِّسَالَةََ وَنَصَّحَ اْلاُمَّةَ وَجَاهَدَ فِي اللهِ حَقَّ جِهَادِهِ وَتَرَكْنَاعَلَى الطَّرِيْقَةِ الْوَاضِحَةِ الْغَرَّاءِ لَيْلِهَا كَنَهَارِهَا لاَيَزِيْغُ عَنْهَا إِلاَّ هَالِكٌ فَمَنْ يُطِعِ اللهَ وَرَسُوْلَهُ فَقَدْ فَازَفَوْزًاعَظِيْمًا وَمَنْ يَعْصِ اللهَ وَرَسُوْلَهُ فَقَدْ ضَلَّ ضلاَلاً مُبيْنا اَلَّلهُمَّ صَلِّ وَسَلِّمْ وَباَِركْ عَلََََََى سَيِّدِنَا مُحَمَّدٍ وَارْضَ الَّلهُمَّ عَنْ اَلِهِ وَصَحَابَتِهِ وَأَحْيِنَا الَّلهُمَّ عَلَي سُنَّتِهِ وَأَمِتْنََا عَلَى مِلَّتَهَ وَاحْشُرْنَا فِى زُمْرَتِهِ مَعَ الَّذِيْنَ اَنْعَمَ اللهَ عَلَيْهِمْ مِنَ النَّبِيِّيْنَ وَالصِّدِّيْقِيْنَ وَالشُّهَدَاء وَالصَّالِحِيْنَ وَحَسُنَ أًوْلَئِكَ رَفِيْقًا. أَمَّابَعْدُ. فَيَا عِبَادَاللهِ أُوْصِيْكُمْ وَنَفْسِى بِتَقْوَى اللهِ فَإِنَّ تَقْوَى اللهِ هُوَخَيْرُزَادِ نَتَقَرَّبُ بِهِ إِلاَّ اللهِ عَزَّوَجَلَّ فَقَالَ تَبَارَكَ وَتَعَالَى وَتَزَوَّدُوْا فَإِنَّ خَيْرَالزَّادِ التَّقْوَى وَاتَّقُوْنِيْ يَا أُولِى اْلأَلْبَاِب

Sidang Jum’at Rahimakumullah …………..
Masih dalam suasana Idul Adha 1428 H, lekan mimbar jum’at niki tiang aturin Selamat merayakan hari raya Idul Adha 1428 H, mudah-mudahan Allah SWT tetep ngicanin pelungguhde tiang kesehatan, keafiatan dait kesempatan bekurban dait tulung semeton jari sak lain. Dait mudah-mudahan hikmah Idul Qurban niki sayan memeprkuat jalinan ukhuwah dait silaturrahim antare pelungguhde tiang. Amieen.


Sidang Jum’at Rahimakumullah …………..
Salak sopok sa’ jari bukti leman kebenaran janji Allah SWT tipa’ Nabi Ibrahim AS adalah kenyataan le’ jelo tanggal 10 Zulhijjah jutaan kaum muslimin-muslimat leman selapuk penjuru dunie bekumpul le’ tao’ sa’ sopo’ kadu pakaian sa’ sopo’ kance niat dait tujuan sa’ sopo’. Selapu semeton jari muslimin muslimat bedait mekerana Allah SWT ngelaksain ibadah wukuf le’ padang Arafah, sambil terus ngaturin do’e-do’e pujian tipa’ deside Allah SWT .

Mawinan nike, tiang ngiring pelungguh sami sila’ sesarengan ngaturin do’e tipa deside Allah SWT, mudah-mudahan selapu’ semeton jarin tiang pelungguh sa’ mau’ kesempatan jari jamaah haji, terutame sa’ leman dese pelungguh niki, ade’ne mau’ kemolahan, sehat wal afiat lahir bathin, sehingge bau isi’ne pade ngelaksanakan selapu’ pegawean kance kewajiban haji, sehingge baunne pade tulak tipa pelungguhde tiang jari haji sa’ mabrur dunie akherat. Amien


Sidang Jum’at Rahimakumullah .......
Perayaan Idul Adha mangkin niki, masih ende’ne bede kance perayaan-perayaan idul adha sa’ sampun liwat, cobaan kance ujian dateng terus menerus tipa’ bangsa Indonesia. Banjir, tanah longsor, gunung meletus, kelaparan, lumpur lapindo, kance situasi ekonomi sa’ sayan parah dait masih loe’ permasalahan negare sa’ nenten man bau teselesaian. Musibah sa’ dateng tipa’ bangsa niki jari ujian kance cobaan tipa’ selapuk panjak de side Allah SWT sa’ beriman kance peringetan ade’de sa’ endak lupa’ kance lalai leman mengingat Allah. Allah SWT sampun bemanik :

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الأمْوَالِ وَالأنْفُسِ وَالثَّمَرَاتِ وَبَشِّرِ الصَّابِرِينَ .الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ

Pasti ja’ ku uji selapu’ panjakku isik rase takut, rase lapah, rase kekurangan le’ doe bande, ketakutan jiwa kance kekurangan buah-buahan, sampaian kabar sa’ bagus tipa’ selapuk panjakku sa’ lamun tedait isi’ musibah tetap inget tipa Aku sambil ucapin : “Selapu’ niki leman de side Allah kance selapu’ne niki ja’ tulak tipa’ de side Allah mesak “. (QS : Al Baqarah 155 -156}


Mawinan nike sila’ le’ jelo sa’ sanget isi’ne mulie niki, tiang ngiring pelungguhde sami ngaturin do’e tipa deside Allah SWT mudah-mudahan selapu’ semeton jari sa’ tedait isi’ musibah nike tetepne sabar nerima ruen cobe, kance sila’ tiang ngiring pelungguh sami le’ jelo qurban niki, terutame tipa’ semeton jari tiang sa’ ara’ kelebihan doe bande, ade’ne bau besedekah, aturin kurban tipa’ semeton jari sa’ tedait isi’ musibah nike, atawe tipa’ semeton jari sa’ kekurangan, mudah-mudahan berkat jelo sa’ suci niki, Allah ngeringanan beban semeton jari dait terekeng selapu’ amalde side pelungguh sebagai amal jariah tipa’ deside Allah SWT. Amin.
Mara’ sa’ sampun pelungguh sami wikan, Idul Qurban selain ngajahin arti persatuan dait kesatuan, Idul Qurban niki ngajahin endah tentang arti berkorban tipa’ semeton jari lain sa’ kurang mampu atawe sa’ kenyengken tedait isi’ musibah. Napilagi tipa’ semeton pade Muslim. Rasulullah SAW sampun bebase :


Sopo’ muslim kance muslim sa’ lain mara’ ibarat penyengker sa’ saling tungke kance saling dukung antare sopo’ semeton kance semeton sa’ lain ( HR. MUSLIM )


Sidang Jum’at Rahimakumullah .......
Pelungguh tiang sak jari panjak Allah Ta’ale, pastine kayunan adekne sak idup lemak lat sayan bagus sayan solah lekan jelo sak mangkin. Tiang ngiring tebareng-bareng intropeksi, atau teendengan bareng-bareng napi ruen hal-hal sak kurang bagus, sak justru ndekne sesuai kance hikmah idul qurban niki. Lamun bagus-bagus entan pelungguh tiang serminan mangkin niki, permasalahan sa’ arak dalem masyarakt pelungguh tiang mangkin niki antare lain :

1. Perselisihan sa’ terjadi antare sopo’ dese kance dese sak lain padahal dese nike tehuni isi’ batur paden Islam
2. Perpecahan sa’ ara’ le’ dalem masyarakat tiang pelungguh mesa’ sa’ tesebaban isi’ perbedaan golongan atawe kelompok

Sebab musabab leman perpecahan niki macem-macem, lagu’ sa’ paling pina’ pelungguh tiang ase’ , perpecahan niki justru terjadi le’ semetonte mesa’ pade Islam sa’ tesebaban isi’ masalah-masalah keagamaan. Mara’ misal: Ara’ sopo’ golongan masyarakat sa’ mele anjengan jum’at mesa’, ara’ kelompok masyarakat sa’ ndekne mele terima pemimpin atau kepale, arak endah sak mekerana ndekne pade golonganne. Perbedaan partai, organisasi dait sak lain-lain.

Sidang Jum’at Rahimakumullah .......
Lamun tecoba pete ruen penyebab atau asal muasal peristiwa sa’ ara’ nike, ara’ dua penyebab sa’ paling utame, kedua hal niki sa’ paling kereng terjadi ele’ dalem masyarakat tiang pelungguh. Sa’ pertame penyebab sa’ dateng leman luah diri’ pelungguh tiang. Sa’ kedua, penyebab sa’ dateng leman awak pelungguh tiang mesak.
Penyebab sak pertame, adalah sengakte sak girang gati pejuluk kemelekte mesak, nenten turutin hasil mufakat atau musyawarah. Sila’ tiang ngiring serminan manik deside Allah SWT :
وَشَاوِرْهُمْ فِي الأمْرِ فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِينَ

Bermusyawarahlah pade selapu’an le’ dalem selesaian sopo’ perkare, lamun ja’ ara’ niatan atawe perbuatan ape jua’, serah kance tawakkal tipa deside Allah SWT, sesungguhne Allah santer isikne kayun tipa’ panjakNe sa’ bertawakkal. (QS : Ali Imran : 159 )

Sampun loe’ gati bukti sa’ bau kepenggitan, selapu’ perkare atawe pegawean napi jua’ pasti selesai kance bagus kejarianne lamun tekadu jalan musyawarah. Perselisihan, permasalahan desa, pembangunan masjid, perkare perkare kemasyarakatan, atawe napi jua’ pastine bagus hasilne lamun teselesaian lekan musyawarah menuju mufakat. Lekan musyawarah selapu’ pegawean sa’ sulit jari muda’, lekan musyawarah selapuk pegawean sengke jari modok.
Selanjutne, penyebab kedua sa’ bau kepenggitan adalah kurangne silaturrahmi. Silaturrahmi sa’ temaksud deriki adalah saling lai’ atawe saling sapa’. Saling lai’ awak, saling sapa’ angen. Baginda Rasulullah sampun bebase le’ sopo’ haditsne :


Sai-sai jua’ sa’ kayun tebeloan umurne kance teluasan rizkine, lue’-lue’ entan sambung silaturrahmi ( HR. Muslim )

Baginda Rasulullah mesa’ sangetne genem pete sahabat-sahabatne sampe-sampe tipa’ musuhne mesa’. Sampun tekesahan le’ hikayat. Ara’ sopo’ dengan yahudi bebale le’ deket ka’bah. Sebilang lumbar Rasulullah ngelaksanain ibadah tipa Ka’bah, pasti dengan Yahudi niki nganteh le’ sopo’ tao’ sambilne tijuh baginda Rasulullah. Kejadian niki tetepne terima isi’ baginda Rasulullah. Pas sopo’ jelo, manusie Yahudi nike nenten’ ne sugul tijuh Rasulullah. Rasulullah bebase, yao’ maka’ne tumben gati nde’ tijuh tiang isik manusie Yahudi nike ? Akhirne Rasulullah beketuan tipa’ sahabat terusne teaturin entanne sa’ dingin sakit Yahudi nike. Langsung Rasulullah beketuan mbe tao balene yahudi nike. Sesampunan nike Baginda Rasul lumbar tipa derike, sambilne doean yahudi niki adekne aru sehat. Tinjut lile yahudi niki sengakne tepete kance todoen bagus isik musuhne mesak. Terusne langsung ngendeng ampun tipa’ Baginda Rasul kance. Berkat hidayah Allah dait kemuliean akhlak Rasulullah, Nenten ngone’ waktu akhirne Yahudi nike langsung tame Islam. Nike ruen conto sa’ sampun tedait lekan baginda Rasul. Nenten bedean manusie, tima’ne musuh atawe napi jua’. Mawinan nike, sila’ tiang ngiring endengan le’ awa’ tiang pelungguh mesa’, senga’ kadang-kadang ini’te nde’ mele saling sapa’ atawe saling lai’, padahal tipa’ batur tiang pelungguh mesa’.

Sidang Jum’at Rahimakumullah .......
Selainan nike arak endah penyebab perselisihan niki sa’ dateng lekan diri’ awak tiang pelungguh mesa’ berue perasaan lebih atawe perasaan “paling” tebandingin isi’ batur atawe kelompok sa’ lain. Perasaan paling kena’, perasaan paling solah, perasaan paling kanggo atawe perasaan paling-paling sa’ lainan. Manik deside Allah SWT :
إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ
Sesungguhne sa’ paling mulie tipa’ deside Allah SWT adalah manusie sa’ paling loe’ takutne tipa’ deside Allah SWT (bertaqwa). ( QS. Al-Hujurat : 13 )


Sidang Jum’at Rahimakumullah .......
Mawinan nike, le’ jelo niki, jelo persatuan selapu’ umat Islam niki, sila’ tiang ngiring pelungguh sami ade’te sa’ bau loe’-loe’ entan pada saling perenget, loe’ loe’ entan musyawarah le’ dalem perkare napi jua, sehingge selapua’an meridap bagus kance solah. Selanjutne tiang ngiring loe’-loe’isi’te pade saling maaf loe’-loe’ isi’te pade bersilaturrahmi tipa’ selapu’ semeton jari sa’ ara’, napilagi tipa’ batur sa’ kurang ara’ atawe kurang mampu. Selain nike, ngiring tepade sambung silaturrahmi tipa’ batur atawe kelompok-kelompok lain, Mudah-mudahan deside Allah SWT tetep meridloi selapuk ruen amal ibadah pelungguh tiang , amien.

Wantas sampun niki atur tiang, tunas maaf ampurayan, lamun ara’ atur base atawe lakun tiang sa’ kurang pelungguhde sami kayunan.

بَارَكَ اللهُ لِى وَلَكُمْ فِى الْقُرْآنِ الْكَرِيْمِ وَنَفَعَنِى وَاِيَّاكُمْ بِمَافِيْهِ مِنَ اْلآيَاتِ وَالذِّكْرِالْحَكِيْمِ وَتَقَبَّلَ اللهُ مِنَّاوَمِنْكُمْ تِلاَوَتَهُ اِنَّهُ هُوَ السَّمِيْعُ الْعَلِيْمُ